एनसेलसँग समुदायस्तर विकासका लागि १६५ बढी परियोजना प्रस्ताव

काठमाडौं । समुदायस्तर विकास परियोजना सञ्चालन गर्न एनसेलसँग १६५ बढी आयोजना प्रस्ताव गरिएको छ । व्यावसायिक सामाजिक जिम्मेवारी (सीएसआर) अन्तर्गत ‘एटीन फर एटीन’ अर्थात १८ का लागि १८ विकास कार्यका लागि आवेदन माग गरिएकोमा देशका सातै प्रदेशबाट १६५ भन्दा बढी आयोजना प्रस्ताव प्राप्त भएको एनसेलले जनाएको छ । एनसेलले १८औं वार्षिकोत्सवको अवसरमा १७ माघसम्म ७ वटै प्रदेशका इच्छुक गैरनाफामूलक संस्थाहरूबाट स्थानीय समुदायलाई हित गर्ने कुनै पनि सामुदायिक विकास परियोजनासम्बन्धी आवेदन दिन भनेको थियो ।

एनसेलका अनुसार देशैभरिबाट शिक्षा, स्वास्थ्य, वातावरण, विपद् व्यवस्थापन तथा प्रतिकार्य र जिविकोपार्जन सहयोग लगायतका क्षेत्रहरुमा विकास कार्य गर्न उत्साहजनक रुपमा प्रस्तावहरु प्राप्त भएका छन् । लागु हुने आयोजनाले समुदायमा पार्ने प्रभाव, त्यसको दिगोपना, आयोजनालाई थप विस्तार गर्न सकिने संभावना लगायतका आधारहरुमा कार्यक्रमहरु छानिने कम्पनीले बताएको छ ।

तोकिएको मापदण्ड र प्रक्रिया पुर्याएर छानिने विकास आयोजनाका लागि कम्पनीले प्रति कार्यक्रम १० लाख रुपैयाँ प्रदान गर्नेछ । यस सामाजिक पहल अन्तर्गत कुल १८ आयोजानाहरु छानिने छन् र प्रत्येक एक प्रदेशमा दुई आयोजना लागु गरिनेछन् । बाँकी चार आयोजनाहरु प्राप्त प्रस्तावको महत्व र प्रभावका आधारमा छानिएका प्रदेशमा कार्यन्वयन गरिने छन् । दिगो विकास लक्ष्यहरू हासिल गर्न सरकारलाई सहयोग गर्ने कम्पनीको प्राथमिकता अनुरुप एनसेलले लामो समयदेखि सीएसआरलाई उच्च प्राथमिकतामा राख्दै आएको छ । विगत १८ वर्षमा एनसेलले शिक्षा, वातावरण र स्वास्थ्य लगायतका विभिन्न क्षेत्रहरुका सामाजिक परियोजनाहरुमा रु १ अर्ब ८० करोड रुपैयाँभन्दा बढी योगदान गरिसकेको छ ।