सुन्दरबजारबाट बसाइँसराइ गर्नेको सङ्ख्या बढ्यो

लमजुङ। लमजुङ जिल्लाको सुन्दरबजार नगरपालिकाबाट अन्यत्र बसाइँ सर्ने परिवारको सङ्ख्या पछिल्लो समय बढेको देखिएको छ।

चालु आर्थिक वर्षको साउनदेखि चैत मसान्तसम्म ७२ परिवारका १९८ जनाले सुन्दरबजार छाडेका छन्। नगरपालिकाको सामाजिक सुरक्षा तथा पञ्जीकरण शाखाका एमआइएस अपरेटर सन्तोष पोख्रेलका अनुसार गत आर्थिक वर्षमा २८ परिवारका ९३ जना बसाइँ सरेकामा चालु आवको चैतसम्म यो सङ्ख्या दोब्बरले बढेको छ। यद्यपि, नगरभित्र अन्यत्रबाट बसाइँसराइ गरी आउनेको सङ्ख्यामा पनि वृद्धि भएको उनले बताए। गत आवमा १३ परिवारका २७ जना सुन्दरबजार आएका थिए भने चालु आवको चैत मसान्तसम्म ३९ परिवारका १२० जना नगरमा बसाइँसराइ गरी आएका पोख्रेलले जानकारी दिए।

११ वटा वडा रहेको सुन्दरबजार नगरपालिकाका केही वडामा बजार विस्तार तीव्र गतिमा भइरहेको छ भने केही वडा अझै ग्रामीण र दुर्गम अवस्थामा छन्। ग्रामीण वडाबाट बजार क्षेत्रमा बसाइँ सर्ने प्रवृत्ति बढ्दो रहेको पोख्रेलले बताए। बजार क्षेत्रबाट ठूला सहरतर्फ बसाइँसराइको गति भने तुलनात्मक रूपमा केही कम रहेको उनको भनाइ छ। चालु आर्थिक वर्षमा सबैभन्दा बढी सुन्दरबजार–३ बाट १४ परिवारका ४१ जना र सबैभन्दा कम वडा नं ५ र १० बाट दुई-दुई परिवारका छ-छ जना बसाइँ सरेका पोख्रेलले जानकारी दिए।

बसाइँसराइ बढ्नुको मुख्य कारण शिक्षा, स्वास्थ्य, रोजगारी र लगानीको खोजी रहेको नगरका निमित्त प्रमुख प्रशासकीय अधिकृत विवेककुमार पण्डितले बताए। “बसाइँसराइ रोक्न स्थानीयस्तरमा रोजगारीको अवसर सिर्जना गर्नु, प्राविधिक शिक्षालय सञ्चालन तथा लगानीको वातावरण बनाउनेतर्फ पालिकाको प्राथमिकता हुनुपर्छ,” उनले भने।

नगरप्रमुख कृष्णप्रसाद कोइरालाले सुन्दरबजारबाट बाहिरिनेको सङ्ख्या भित्रिनेको भन्दा बढी हुनु नगरका लागि चिन्ताको विषय बनेको बताए। “पालिकाले रोजगारी तथा सेवा प्रवाह सहज हुने कार्यक्रम लागू गरिरहेको छ। बसाइँसराइको कारण पहिचान गरी समाधानको उपाय अवलम्बन गर्दै अगाडि बढ्नेछौँ,” उनले भने। आर्थिक सम्पन्नता, शिक्षा, स्वास्थ्य उपचार, रोजगारी, व्यापार व्यवसाय र पारिवारिक सम्पर्क लगायतका विविध कारणले नगरवासी ठूला सहरतिर बसाइँ सरिरहेको उनको भनाइ छ।