डेढ अर्बमा बिक्री हुँदै सुनको ट्वाइलेट !

एउटा ट्वाइलेट सीट पछिल्ला दिनमा चर्चामा छ । किनकि यसको मूल्य करीब डेढ अर्ब रुपैयाँ तोकिएको छ । पत्याउनै नसकिने यो समाचार इटालीको हो । त्यहाँका चर्चित कलाकार मोरिजियो क्याटलनको १८ क्यारेट सुनबाट बनेको ट्वाइलेट आगामी १८ नोभेम्बरमा न्युयोर्कस्थित सोटबीमा लिलाम गरिँदैछ । विशेष कलाकारिता प्रयोग गरी बनाइएको भनिएको उक्त ट्वाइलेट सीटको वजन २ सय २३ पाउण्ड छ । उक्त वस्तुको सुरुवाती बोली नै १ करोड डलर राखिएको छ । लिलाम बढाबढमा त्यसभन्दा उच्च बोली लाग्ने अपेक्षा सोटबीले गरेको छ । सुनको सिंहासनवाला अनुभूति प्रदान गर्ने उक्त ट्वाइलेट सीट आगामी नोभेम्बर ८ मा सोटबीको नयाँ मुख्यालय ब्रेउर बिल्डिंगको बाथरुममा प्रदर्शित गरिनेछ । त्यहाँ आगन्तुकहरूलाई उक्त ट्वाइलेट सीट हेर्ने मौका मिल्नेछ । त्यसअघि सो ट्वाइलेट सीटलाई गगनहाइम म्युजियममा सन् २०१६ मा आम मानिसहरूका लागि प्रदर्शनमा राखिएको थियो । आयोजकहरूको तर्फबाट बताइए अनुसार सो ट्वाइलेट सीटमा कोहीपनि बस्न पाउने छैनन् । सोटबीका विज्ञ डेभिड ग्याल्परिनले भनेका छन्( हामी चाहँदैनौँ कि मानिसहरू कुनै कलाकृतिमाथि बसुन् । उनले यो कलाकृतिलाई एक विरोधाभाषी सामाजिक टिप्पणीको रूपमा बनाएका थिए र त्यसको नाम अमेरिका राखेका थिए । साथै उनले भनेका थिए कि उनी केही अनमोल चिजलाई सबैभन्दा कम महान तथा सबैभन्दा आवश्यक स्थानमा राख्न चाहन्छन् । उक्त सुनको ट्वाइलेट सन् २०१६ मा न्युयोर्कको गगनहाइम म्युजियममा पहिलोपटक प्रदर्शन गरिएको थियो । कतिपय आलोचकहरूले यसको तुलना दादा आन्दोलनका कलाकार मार्सेल डुशान्पको सन् १९१७ को पोर्सेलिन युरिनल फाउन्टेनसँग गरेका थिए । त्यसलाई हेर्न र प्रयोग गर्नका लागि करिब १ लाख मानिसको लाइन लागेको थियो । स्मरण रहोस् यसअघि सोसल मिडियामा एउटा केराको तस्वीर भाइरल बनेको थियो । टेपले भित्तामा टाँसिएको उक्त केराको कलाकृति पनि ट्वाइलेट कलाकारले नै बनाएका थिए । उक्त केरा ६० लाख डलरमा बिक्री भएको थियो ।