रास्वपा बागमती अधिवेशन आजबाट

मकवानपुर । राष्ट्रिय स्वतन्त्र पार्टी (रास्वपा) बागमती प्रदेशको अधिवेशन हेटौँडामा आजबाट सुरु हुँदै छ । हेटौँडा १ स्थित हिमालयन दरबार पार्टी प्यालेसमा अधिवेशन आयोजना हुनेछ । प्रदेशका १३ जिल्लाका करिव १ हजार ५०० प्रतिनिधि सहभागी हुने उक्त अधिवेशन मंगलबार बिहानैबाट तयारी भइरहेको छ । कार्यक्रम स्थलमा नेता तथा कार्यकर्ताको आवागमन भइरहेको छ । अधिवेशनले नयाँ नेतृत्व चयन गर्ने तयारी छ । अधिवेशन उद्घाटन गर्न रास्वपा सभापति हेटौँडा नआउने भएका छन् । मंगलबार हेटौँडामा हुने भनिएको बागमती प्रदेशको प्रथम अधिवेशन उद्घाटन गर्न सभापति लामिछाने आउने भनिएपनि अन्तिममा उनी नआउने भएका हुन् ।

अधिवेशनको उद्घाटन कार्यक्रममा सहभागी हुन केन्द्रीय समितिका सदस्य पुकार बम, राजीव खत्री लगायतका नेताहरू भने सोमबार नै हेटौँडा आइसकेका छन् । प्रतिनिधि सभाको बैठक भएकाले सभापति लामिछाने आउन नसक्ने रास्वपा स्रोतले जानकारी दियो । तर, सभापति कार्यक्रममा आउने नआउने बारेमा आफूहरूलाई पक्का जानकारी नभएको भन्दै बागमती प्रदेश सभापति अत्युत्तम लामिछाने र मकवानपुर जिल्ला सभापति सञ्जीव पाठकले अनभिज्ञता प्रकट गरे । यसअघि बागमती प्रदेश समिति र जिल्ला समिति दुवैले हेटौँडामा हुने बागमती प्रदेश अधिवेशन उद्घाटन गर्न पार्टी सभापति लामिछाने आउने भन्दै प्रचार प्रसार गरेका थिए ।