मर्क्योर काठमाडौं सुकेधारा हाइट्सलाई अन्तर्राष्ट्रिय रूपमा मान्यता प्राप्त ‘ग्रीन की’ प्रमाणपत्र

काठमाडौं। मर्क्योर काठमाडौं सुकेधारा हाइट्सले दिगो पर्यटनका लागि अन्तर्राष्ट्रिय रूपमा मान्यता प्राप्त ‘ग्रीन की’ प्रमाणपत्र प्राप्त गरेको छ। यो उपलब्धिसँगै होटलले नेपालको आतिथ्य क्षेत्रमा वातावरणमैत्री तथा जिम्मेवार पर्यटन प्रवर्द्धनप्रतिको आफ्नो प्रतिबद्धता थप सुदृढ गरेको छ। ‘ग्रीन की’ वातावरणीय शिक्षा प्रतिष्ठान (फाउन्डेसन फर इन्भाइरोन्मेन्टल एजुकेसन–एफईई) द्वारा सञ्चालित अन्तर्राष्ट्रिय इको–लेबल हो। यसले वातावरणीय व्यवस्थापन तथा दिगो सञ्चालनका कडा मापदण्ड पूरा गर्ने होटल तथा पर्यटन व्यवसायलाई मान्यता प्रदान गर्दछ। होटलले दिगोपनासम्बन्धी १३ वटा क्षेत्रमा गरिएको स्वतन्त्र मूल्याङ्कनपछि उक्त प्रमाणपत्र प्राप्त गरेको हो। मूल्याङ्कनका क्षेत्रहरूमा ऊर्जा तथा पानीको दक्ष उपयोग, फोहोर न्यूनीकरण, जिम्मेवार खाद्य सामग्रीको स्रोत छनोट, कर्मचारी तालिम र सामुदायिक सहभागितालगायत विषय समावेश छन्। यस उपलब्धिसँगै मर्क्योर काठमाडौं सुकेधारा हाइट्स ८० भन्दा बढी देशमा रहेका ‘ग्रीन की’ प्रमाणित प्रतिष्ठानहरूको अन्तर्राष्ट्रिय सञ्जालमा जोडिएको छ। प्रमाणपत्रले होटलको दैनिक सञ्चालनमा दिगो अभ्यासहरू लागू गर्न व्यावहारिक आधार प्रदान गर्नुका साथै काठमाडौंको स्थानीय वातावरणीय आवश्यकताअनुसार अन्तर्राष्ट्रिय मापदण्ड अवलम्बन गर्न सहयोग गर्नेछ। ‘ग्रीन की’ प्रमाणपत्र प्रत्येक वर्ष नवीकरण गर्नुपर्ने भएकाले होटलले आगामी दिनमा समेत वातावरणीय अभ्यास र दिगोपनाका मापदण्डलाई निरन्तर सुधार गर्दै लैजाने जनाएको छ। यस उपलब्धिको अवसरमा आयोजित कार्यक्रममा नेपालका लागि फ्रान्सका राजदूत महामहिम फ्रान्स्वाज पुइग–इन्जा, अध्यक्ष देशबन्धु बस्नेत, होटलका महाप्रबन्धक अभिषेक पासरिचा तथा मर्क्योर काठमाडौंको सम्पूर्ण टोलीको उपस्थिति रहेको थियो।

नेपालका लागि फ्रान्सका राजदूत महामहिम फ्रान्स्वाज पुइग–इन्जाले होटललाई बधाई दिँदै यस उपलब्धिले नेपालका अन्य होटल तथा पर्यटन व्यवसायलाई पनि दिगो आतिथ्य अभ्यास अपनाउन प्रेरित गर्ने विश्वास व्यक्त गरे। उनले भने, “ग्रीन की प्रमाणपत्र प्राप्त गरेकोमा मर्क्योर काठमाडौं सुकेधारा हाइट्सलाई हार्दिक बधाई दिन चाहन्छु। यो उपलब्धिले दिगो आतिथ्यप्रतिको वास्तविक प्रतिबद्धता झल्काउँछ। यसले नेपालका अन्य प्रतिष्ठानलाई पनि यस्तै पहल गर्न प्रेरित गर्नेछ भन्ने आशा लिएको छु। यस महत्वपूर्ण उपलब्धिका लागि मर्क्योर काठमाडौंको सम्पूर्ण टोलीलाई बधाई दिन्छु।” होटलका महाप्रबन्धक अभिषेक पासरिचाले ग्रीन की प्रमाणपत्र प्राप्त गर्नु सम्पूर्ण टोलीका लागि गौरवको विषय भएको बताए। उनका अनुसार नेपालमै पहिलो होटलका रूपमा यो मान्यता प्राप्त गर्नु टोलीको सामूहिक प्रयास र प्रतिबद्धताको प्रतिफल हो। उनले भने,“ग्रीन की प्रमाणपत्र प्राप्त गर्नु हाम्रो लागि सम्मान र गर्वको क्षण हो। नेपालमा यो विशिष्ट मान्यता प्राप्त गर्ने पहिलो होटलका रूपमा हाम्रो सम्पूर्ण टोलीको प्रयासले पहिचान पाउनु महत्वपूर्ण उपलब्धि हो। यो हाम्रो यात्राको अन्त्य होइन, बरु सुरुवात हो। हामी वातावरणीय दिगोपनाका प्रयासलाई निरन्तर सुधार गर्दै अझ उच्च स्तरमा पुर्‍याउन प्रतिबद्ध छौँ।” ग्रीन की प्रमाणपत्र मर्क्योर काठमाडौं सुकेधारा हाइट्सको जिम्मेवार आतिथ्यतर्फको यात्रामा अर्को महत्वपूर्ण उपलब्धि हो। होटलले आफ्ना पाहुना, कर्मचारी तथा समग्र समुदायका लागि अर्थपूर्ण र गुणस्तरीय अनुभव सिर्जना गर्दै वातावरणीय अभ्यासमा निरन्तर सुधार गर्ने प्रतिबद्धता व्यक्त गरेको छ।