एनपीएल विजेताले १ करोड ५० लाख रूपैयाँ पाउने

काठमाडौं । नेपाली घरेलु क्रिकेटको सबैभन्दा ठूलो र चर्चित फ्रेन्चाइज प्रतियोगिता ‘नेपाल प्रिमियर लिग’ (एनपिएल) को तेस्रो संस्करण (सिजन ३) का लागि ऐतिहासिक पुरस्कार राशिको घोषणा गरिएको छ । नेपाल क्रिकेट संघ (क्यान) ले यस पटक विजेता टोलीले नगद १ करोड ५० लाख (१.५ करोड) रुपैयाँ प्राप्त गर्ने बताएको हो । यो नेपाली खेलकुदकै इतिहासमा कुनै पनि घरेलु प्रतियोगितामा प्रदान गरिएको अहिलेसम्मकै सर्वाधिक धनराशिको पुरस्कार हो । यस पटकको संस्करणमा उपाधि विजेता मात्र नभई शीर्ष चार स्थान (प्लेअफ) सम्म पुग्ने सबै टोलीहरूलाई आकर्षक नगद पुरस्कारको व्यवस्था गरिएको छ । प्रतियोगिताको शीर्ष चार टोलीका लागि मात्रै कुल ३ करोड रुपैयाँ पुरस्कार राशि छुट्याइएको क्यानका कोषाध्यक्ष पदम बहादुर खड्काले बताए । उनका अनुसार विजेता (प्रथम)ले १ करोड ५० लाख रुपैयाँ (१.५ करोड) पाउँदा उपविजेताले ८० लाख रुपैयाँ, तेस्रो स्थानमा रहनेले ४० लाख रुपैयाँ र चौथो स्थानमा रहने टिमले ३० लाख रुपैयाँ पाउनेछन् । गत संस्करणहरूमा नेपाल प्रिमियर लिग (एनपिएल) को कुल पुरस्कार राशि २ करोड १ लाख रुपैयाँ रहेको थियो ।

जसअनुसार विजेता (प्रथम)ले १ करोड १० लाख रुपैयाँ, उपविजेता (दोस्रो)ले ५१ लाख रुपैयाँ, तेस्रो स्थानमा रहनेले २५ लाख रुपैयाँ र चौथो स्थान रहने टिमले १५ लाख रुपैयाँ पाएका थिए । पुरस्कार राशिमा गरिएको यो ऐतिहासिक वृद्धिले नेपाली क्रिकेटको व्यावसायिकतालाई अन्तर्राष्ट्रिय स्तरमा पुर्‍याउन मद्दत गर्ने विश्वास क्यानको छ । क्यानका अधिकारीहरूका अनुसार खेलाडीहरूको मिहिनेतको कदर गर्न र प्रतियोगिताको स्तर उकास्न पुरस्कार राशि बढाइएको हो । ठूलो धनराशिका कारण यस पटक स्वदेशी खेलाडीहरूका साथै विभिन्न देशका चर्चित अन्तर्राष्ट्रिय खेलाडीहरूको आकर्षण पनि एनपिएलमा थप बढेको छ । शीर्ष चार टोलीलाई दिइने ३ करोड बाहेक प्रतियोगिताको ‘प्लेयर अफ द सिरिज’ (सर्वोत्कृष्ट खेलाडी), उत्कृष्ट ब्याटर, उत्कृष्ट बलर तथा ‘इमर्जिङ प्लेयर’ (उदीयमान खेलाडी) का लागिसमेत नगद, कार तथा मोटरसाइकलसहितका आकर्षक पुरस्कारहरू दिइने गरिएको छ । देशभरका ८ वटै फ्रेन्चाइज टोलीहरूले उपाधि जित्ने दाबीसहित तयारी तीव्र पारिरहेका बेला पुरस्कार राशिको यो घोषणाले खेलाडी तथा समर्थकहरूमाझ थप उत्साह र रोमाञ्चकता थपेको छ ।