ए डिभिजन लिग: भुटानी फरवार्ड चेन्चोले डेब्यु गर्ने सम्भावना
काठमाडौं । सहिद स्मारक ए डिभिजन लिगमा आज साविक विजेता मच्छिन्द्र क्लबले हिमालयन शेर्पासँग प्रतिस्पर्धा गर्दैछ ।
सातदोबाटोस्थित एन्फा कम्प्लेक्समा हुने खेल दिउँसो २ बजे सुरु हुनेछ । अपेक्षा अनुसारको प्रदर्शन गर्न नसकिरहेको मच्छिन्द्र तालिकाको ११ औँ स्थानमा छ । उसको ५ खेलबाट ५ अंक छ । अघिल्लो खेलमा मच्छिन्द्र चर्च ब्वाइज युनाइटेडसँग गोलरहित बराबरीमा रोकिएको थियो ।
आज भुटानी फरवार्ड चेन्चो ग्याल्छेनले पनि ए डिभिजन लिगमा डेब्यु गर्ने सम्भावना उच्च छ । उनलाई मच्छिन्द्रले यसै साता अनुबन्धन गरेको हो । ५ अंकनै जोडेको शेर्पा १० औँ स्थानमा छ । शेर्पाले पनि पाँचौ चरणको खेलमा संकटा क्लबसँग बराबरी खेलको थियो ।
अर्को खेलमा त्रिभुवन आर्मी फुटबल क्लब र थ्री स्टार आमनेसामने हुनेछन् । यो खेल च्यासल मैदानमा दिउँसो २ बजेनै हुनेछ । सातौँ स्थानमा रहेको आर्मीको ८ अंक छ ।
७ अंक जोडेको थ्री स्टार आठौँ स्थानमा छ । अघिल्लो खेलमा जावलाखेल युथ क्लबसँग १ – ० गोलले हारेको थ्री स्टार पुनरागमनको प्रयासमा छ । आर्मी भनेलगातार दोस्रो जित हात पार्ने लक्ष्यमा छ । उसले पाँचौँ चरणको खेलमा फ्रेन्डस क्लबलाई २ – १ गोलले हराएको थियो ।