नेपालविरुद्ध मलेसियाको राम्रो शुरुवात, कप्तान फैजले बनाए अर्धशतक
काठमाडौं । एसिसी प्रिमियर कपको पहिलो खेलमा अहिले मलेसियाले नेपालविरुद्ध टस जितेर पहिला ब्याटिंग गरिरहेको छ ।
किर्तिपुरस्थित टियु मैदानमा जारी खेलमा मलेसियाले ठोस शुरुवात गरेको छ । मलेसियाका कप्तान अहमद फैज अर्धशतक बनाएर खेलिरहेका छन् । उनी अहिले ७५ बलमा ६१ रन बनाएर खेलिरहेका छन् भने उनलाई विरनदीप सिंहले ३३ रन बनाएर साथ दिइरहेका छन् ।
त्यस्तै नेपालका बलर गुलशन झाले एक विकेट लिए पनि अन्य बलरले मलेसियाका ब्याट्सम्यानमाथि दबाब बनाउन असफल भएका छन् ।
यो समाचार तयार गरुन्जेल मलेसियाले २७ ओभरमा एक विकेट गुमाएर ११५ रन बनाएको छ ।
१० टोली सहभागी प्रतियोगिताको समूह ए मा आयोजक नेपालसँगै ओमान, कतार, मलेसिया र साउदी अरब छन् । समूह बी मा युएई, हङकङ, कुवेत, सिंगापुर र बहराइन छन् । प्रतियोगिता वैशाख ५ देखि १८ गतेसम्म टियु र मुलपानी क्रिकेट मैदानमा हुनेछ । हरेक समूहका शीर्ष दुई टोलीले सेमिफाइनलमा पुग्ने छन् ।विजेता टोलीले एसिया कपमा भारत र पाकिस्तानसँग खेल्न पाउने छ ।