सुनकोशीमा खसेको सरकारी गाडीसहित २ शव पर्याे फेला
काठमाडौं । प्राविधिक शिक्षा तथा व्यावसायिक तालिम परिषद् सीटीईभीटीका अधिकारीहरुसहित सुनकोशी नदीमा खसेको गाडी ५ दिनमा फेला परेको छ । सुनकोशी नदिमा खसेको गाडीसहि २ वटा शव पनि फेला परेको सशस्त्र प्रहरीका डीएसपी तथा सहायक प्रवक्ता शैलेन्द्र थापाले जानकारी दिए । उनका अनुसार शवको सनाखत हुन बाँकी छ ।
सीटीईभीटीका दुई निर्देशक र अधिकृत चढेको बा १ झ ७४६७ नम्बरको जीप गत शुक्रबार मध्यपहाडी लोकमार्गको खुर्कोट–घुर्मी खण्डअन्तर्गत गोलन्जोर गाउँपालिका–७ को लौकुनबाट सुनकोशी नदीमा झरेको थियो ।
त्यो गाडी सशस्त्र प्रहरी बल नेपाल विपद् व्यवस्थापन तालिम शिक्षालय कुरिनटारबाट खटिएको इन्सपेक्टर सुवास थापाको निर्देशनमा गोताखोरसहितको टोलीले खोजिरहेको समयमा मंगलबार फेला परेको हो ।