मिलेमतोमा मेडिसिटी अस्पतालमा तीन पूर्वकर्मचारीले ठगे साढे दुई करोड
काठमाडौं । अस्पताल प्रशासनले सामान्य छनकसमेत नपाउने गरी मिलेमतोमा मेडिसिटी अस्पतालमा साढे दुई करोड ठगी भएको छ । अस्पतालको बिलिङ शाखाका तीन पूर्वकर्मचारीको मिलेमतोमा अस्पतालकै रकम ठगी भएको हो ।
अस्पतालमा बिल काटेर ठगी गर्ने उनीहरुलाई ललितपुर प्रहरीले पक्राउ गरिसकेको छ । पक्राउ पर्नेमा दोलखा भीमेश्वर नगरपालिका–४ घर भई भक्तपुर ठिमी बस्ने ३४ वर्षीय राघव सापकोटा, ललितपुरको गोदावरी नगरपालिका–११ चापागाउँ बस्ने २९ वर्षीय सनम देशार र काठमाडौं–४ बालुवाटार बस्ने ३४ वर्षीय आशिष अर्याल छन् ।
उनीहरुले अस्पतालमा प्रयोग हुँदै आएको ‘शुक्र’ नामको एचएमआईएस सफ्टवेयरको दुरुपयोग गरी बिरामीहरुबाट बेड चार्ज, डाक्टर चार्ज, नर्सिङ चार्जवापत वास्तविक शुल्क लिने, तर सफ्टवेयर इन्ट्रीमा भने वास्तविक शुल्कभन्दा कम देखाउँदै अस्पतालमा ठगी गरेको पाइएको प्रहरीले जनाएको छ। यसरी उनीहरुले अस्पतालबाट दुई करोड ६३ लाख ५५ हजार रुपैयाँ ठगी गरेको पाइएको अनुसन्धानबाट खुलेको छ। प्रहरीले उनीहरूलाई ललितपुर जिल्ला अदालतमा मयद थप गरी अनुसन्धान थालेको छ ।