नेपालमा उबरको सेवा सुरु, ‘उबर गो’, ‘उबर कम्फर्ट’, ‘उबर बाइक’ सेवा सञ्चालन

काठमाडौं । विश्वव्यापी राइड सेयरिङ एप उबरले आजदेखि नेपालमा आफ्नो आधिकारिक सेवा सुरु गरेको छ । कम्पनीले काठमाडौंमा औपचारिक कार्यक्रम गरी सेवा सुरु भएको घोषणा गरेको हो । यससँगै दक्षिण एसियाका तीव्र गतिमा विकसित हुँदै गएका सहरी बजारहरूमध्ये एक नेपालमा उबरको यातायात प्लेटफर्म उपलब्ध भएको छ । यो सुरुआतसँगै नेपाल उबरको एपीएसी क्षेत्रको ११औँ बजार बनेको छ । एक दशकयता दक्षिण एसियामा उबरले प्रवेश गरेको पहिलो नयाँ बजार पनि बनेको छ, जसले उबरको विश्वव्यापी विस्तार यात्रामा यस क्षेत्रको रणनीतिक महत्वलाई थप सुदृढ बनाएको छ ।

नेपालमा उबरले चारपांग्रे सवारीअन्तर्गत ‘उबर गो’ र ‘उबर कम्फर्ट’ तथा दुईपांग्रे सवारीअन्तर्गत ‘उबर बाइक’ सेवा सञ्चालनमा ल्याएको छ । यी सेवाहरूले यात्रुहरूलाई सहरभित्र आवतजावतका लागि सरल, भरपर्दो र सहज विकल्प प्रदान गर्नेछन् । नेपाल अब ७० भन्दा बढी देशहरूमा फैलिएको उबरको विश्वव्यापी सञ्जालको हिस्सा बनेको छ । यसले यात्रुहरूलाई विश्वका प्रायः जुनसुकै स्थानमा पनि एउटै परिचित एपमार्फत यात्रा गर्न सकिने सुविधा प्रदान गर्छ ।