कनेक्ट फर इम्प्याक्ट अभियानसहित क्लासिक टेकले मनायो १७औं वार्षिकोत्सव

काठमाण्डौं । इन्टरनेट सेवा प्रदायक कम्पनी क्लासिक टेकले कनेक्ट फर इम्प्याक्ट मूल नारासहित आफ्नो १७औं वार्षिकोत्सव मनाएको छ। वार्षिकोत्सवका अवसरमा कम्पनीले गुणस्तरीय इन्टरनेट सेवा प्रदान गर्नुका साथै प्रविधिमार्फत शिक्षा, रोजगारी र समावेशी विकासमा योगदान पुर्‍याउने प्रतिबद्धता दोहोर्‍याएको छ। कम्पनीका अनुसार कनेक्ट फर इम्प्याक्ट अभियान सामाजिक उत्तरदायित्वलाई केन्द्रमा राखेर सकारात्मक परिवर्तन ल्याउने दीर्घकालीन अभियान रहेको छ। यसअन्तर्गत क्लासिक टेकले नेपाल अपाङ्ग महिला संघसँग समावेशी रोजगारी प्रवर्द्धनका लागि समझदारीपत्रमा हस्ताक्षर गरेको छ। साथै, अनमोल चिल्ड्रेन डेभलपमेन्ट होमलाई निःशुल्क उच्च गतिको इन्टरनेट सेवा र एक थान कम्प्युटर उपलब्ध गराएर बालबालिकाको डिजिटल शिक्षामा सहयोग गरेको जनाएको छ। कम्पनीले ग्राहक, कर्मचारी, साझेदार तथा शुभेच्छुकप्रति आभार व्यक्त गर्दै आगामी दिनमा पनि गुणस्तरीय सेवा र सामाजिक उत्तरदायित्वमार्फत समाजमा सकारात्मक प्रभाव सिर्जना गर्ने अभियानलाई निरन्तरता दिने कम्पनीको भनाइ छ।