नेप्से ३३.२८ अंकले घट्दा ६ अर्ब ८ करोडको कारोबार,आज पुनः ओरालो

काठमाडौं । साताको पहिलो कारोबार दिन सोमबार नेपाल स्टक एक्सचेञ्ज (नेप्से) परिसूचकमा गिरावट आएको छ। गत साता सुधारको लयमा देखिएको बजार आज पुनः ओरालो लागेको हो। नेप्से परिसूचक आज ३३.२८ अंकले घटेर २,७०१.३२ विन्दुमा झरेर रोकिएको छ। आज बजार खुलेदेखि नै गिरावटको क्रम जारी थियो। समग्रमा परिसूचक १.२१ प्रतिशतले घटेको छ। सोमबार कुल ३६० कम्पनीका १ करोड ३९ लाख २५ हजार ३३७ कित्ता शेयर किनबेच हुँदा कुल ६ अर्ब ८ करोड ८६ लाख रुपैयाँ बराबरको कारोबार भएको छ। आज बजारमा कुल ६९ हजार ८०३ वटा कारोबार भएका छन्। आज कुल ३६ कम्पनीको शेयर मूल्यमा वृद्धि भएको छ भने २३४ कम्पनीको मूल्य घटेको छ।

बाँकी ५ कम्पनीको शेयर मूल्य भने स्थिर रहेको नेप्सेले जनाएको छ। आज घट्दो बजारमा पनि सबैभन्दा धेरै कमाउनेमा एभरेष्ट कलर लिमिटेड रहेको छ, जसको मूल्य १४.९९ प्रतिशतले बढेको छ। अरु कुनै पनि कम्पनीको मूल्यमा उल्लेख्य वृद्धि छैन । आज आत्मनिर्भर लघुवित्तको १३ प्रतिशतले घटेको छ । आज बैंकिङ र म्युचुअल फण्ड बाहेक सबै समूह घटेका छन् । उत्पादन ब्यापार र होटल क्षेत्रमा २ प्रतिशत भन्दा धेरै गिरावट छ । कारोबार रकमका आधारमा आज रिलायन्स स्पिनिङ मिल्स ३३ करोड ८६ लाख ६६ हजार ५८१ रुपैयाँसहित शीर्ष स्थानमा रहेको छ। त्यसैगरी ग्लोबल आईएमई बैंक, रिडी हाइड्रोपावर, कुमारी बैंक र सेन्ट्रल फाइ क्रमशः सर्वाधिक कारोबार हुने अन्य कम्पनीको रुपमा रहेका छन्।