दसैँलक्षित सहुलियत पसल भदौ ३० गतेदेखि सञ्चालन गर्ने

काठमाडौं । सरकारले यस वर्षको दसैँलक्षित सहुलियत पसल भदौ अन्तिम साताबाट सञ्चालन गर्ने भएको छ । खाद्य व्यवस्था तथा व्यापार कम्पनीले यसका लागि तयारी पूरा गरेको छ । भदौ ३० गते उद्घाटन गर्ने गरी आन्तरिक छलफल भइरहेको खाद्य व्यवस्था तथा व्यापार कम्पनी खरिद विभाग प्रमुख अनन्तराज पौडेलले जानकारी दिए । उनका अनुसार, सहुलियत पसल सञ्चालनका लागि खाद्यले मन्त्रालयमा प्रस्ताव पठाइसकेको छ ।

मन्त्रालयबाट निर्णय भएर आएपछि पसल उद्घाटनको मिति तय हुनेछ । हामीले भदौको अन्तिम साता दसैँलक्षित सहुलियत पसल खोल्ने प्रस्ताव उद्योग, वाणिज्य तथा आपूर्ति मन्त्रालयमा पठाएका छौँ । यस वर्ष खाद्यका सबै आउटलेटबाट सहुलियत पसल सञ्चालन हुने पौडेलले बताए । कम्पनीले गत वर्ष दसैँ तिहारका लागि ६० वटा सहुलियत पसल सञ्चालन गरेको थियो । देशभरका विभिन्न ठाउँमा खुल्ने यस्ता पसलमा बजार मूल्यभन्दा केही सस्तोमा दाल, चामल, गेडागुडी, चिनी तथा मसला खरिद गर्न सकिने कम्पनीले जनाएको छ ।