विशेष महाधिवेशन देउवाले मानेनन्

काठमाडौँ । नेपाली कांग्रेसका कार्यवाहक सभापति पूर्णबहादुर खड्काले अनेक प्रयास गर्दा पनि महाधिवेशनसम्बन्धी विवाद सुल्झिन सकेन । सभापति शेरबहादुर देउवाले गत असोज २८ गते केन्द्रीय कार्यसमिति बैठक सुरु गर्दै उपसभापति खड्कालाई कार्यवाहक सभापतिको जिम्मेवारी दिएका थिए । त्यसलगत्तै खड्काले महाधिवेशन सम्बन्धमा देखिएको विवाद समाधानका लागि गरेको प्रयासले सार्थकता नपाएपछि बिहीबार दिनभर सभापति देउवाले नै विवाद मिलाउन प्रयास गरे । देउवाले दिउँसो पार्टीभित्र संस्थापन (आफ्नो गुटका) भनेर चिनिने कार्यवाहक सभापति खड्का, पूर्वपदाधिकारीहरू विमलेन्द्र निधि, गोपालमान श्रेष्ठ, विजयकुमार गच्छदार, प्रकाशमान सिंह, डा. शशांक कोइराला, कृष्णप्रसाद सिटौला, प्रवक्ता डा प्रकाशशरण महत तथा केन्द्रीय सदस्यहरू बालकृष्ण खाण, एनपी साउद, रमेश लेखक, मीन विश्वकर्मालगायतसँग छलफल गरे । संस्थापन पक्षका नेताहरूसँगको छलफलपछि साँझ कार्यवाहक सभापति खड्का तथा महामन्त्रीद्वय गगन थापा र विश्वप्रकाश शर्मा, केन्द्रीय सदस्य रमेश लेखकसँग सभापति देउवाले कुराकानी गरे । तर, देउवाको प्रयासले पनि सार्थकता पाएन । महामन्त्रीद्वय थापा र शर्मा विशेष महाधिवेशनको पक्षमा अडिग रहँदा सभापति देउवा विशेष महाधिवेशनका लागि राजी भएनन् । महामन्त्रीद्वय थापा र शर्मा आफूहरूले भनेको समयमा संस्थापन पक्षले नियमित महाधिवेशन हुन दिनेमा विश्वस्त हुन सकेनन् । देउवाले नेताहरूलाई विशेष महाधिवेशनमा गए पार्टी विभाजन हुने भन्दै यसलाई रोक्ने ढंगबाट पार्टी चलाउन दुवै बैठकमा नेताहरूलाई निर्देशन दिएका थिए । ‘विशेष महाधिवेशनले पार्टी फुटाउँछ । पार्टी फुटेको,टुटेको म हेर्न सक्दिनँ,’ दुवै बैठकमा सहभागी एक नेताले देउवाको भनाइ उद्धृत गर्दै भने, ‘सल्लाह गरौँ । मिलेर अघि बढौँ । गर्नचाहिँ नियमित महाधिवेश नै गरौँ ।’ देउवाले संस्थापन पक्षका नेताहरूलाई निर्वाचन अगाडि महाधिवेशन गर्नै हुन्न भन्ने अड्डी त्याग्न निर्देशन दिए भने महामन्त्रीद्वयलाई पनि पार्टी फुट्ने तरिकाले होइन, पार्टीलाई एकताबद्ध र सुदृढ बनाउने गरी महाधिवेशन गर्ने वातावरण बनाउन निर्देशन दिए । महामन्त्री थापाले सभापति देउवासँगको भेटमा विधान अनुसार महाधिवेशन प्रतिनिधिले माग गरेको विशेष महाधिवेशनमा जानुपर्ने धारणा राखेका थिए । जबाफमा देउवाले स्पष्ट रूपमा विशेष महाधिवेशन गर्न नसक्ने बताएका थिए । त्यसपछि थापाले सभापतिबाटै विशेष महाधिवेशनको माग गर्दा पार्टीभित्र पक्ष÷विपक्ष नहुने हुँदा विशेष महाधिवेशन आह्वान गर्न आग्रह गरे । सभापतिले नै आह्वान गर्दा सर्वसम्मत हुने उनको भनाइ थियो ।

थापाको त्यो आग्रहमा पनि देउवाले सल्लाह गर्नुपर्ने बताए । त्यसबाहेक उनी थप केही बोलेनन् । थापाले केन्द्रीय कार्यसमिति बैठकमा पनि मंसिर २७ गते विशेष महाधिवेशन गर्ने प्रस्ताव राखिसकेका छन् । २ हजार ४८८ महाधिवेशन प्रतिनिधिले विशेष महाधिवेशन माग गर्दै असोज २९ गते कार्यवाहक सभापति खड्कालाई हस्ताक्षर बुझाएका छन् । संस्थापन पक्ष र त्यसमाथि पूर्वउपसभापति विमलेन्द्र निधि, पूर्वमहामन्त्री कृष्णप्रसाद सिटौला, पूर्वमहामन्त्री डा। शशांक कोइराला र प्रवक्ता डा प्रकाशशरण महत कुनै पनि हालतमा विशेष महाधिवेशन गर्न नहुने बताइरहेका छन् । यसको विकल्पमा महामन्त्रीद्वयले फागुन २१ गतेका लागि तोकिएको प्रतिनिधिसभा निर्वाचन अगाडि पार्टीको १५ औँ नियमित महाधिवेशन गर्ने विकल्प राखेका छन् । त्यो विकल्पमा पहिला सहमत नभएको संस्थापन पक्ष पछिल्लो समय लचक भएको छ । तर, महामन्त्रीहरू भने निर्वाचन अगाडि नियमित महाधिवेशन गर्न संस्थापन तयार हुन्छ भन्नेमा विश्वस्त हुन सकेका छैनन् । त्यो शंका उनीहरूले बिहीबार देउवासँगको बैठकमा पनि राखे । देउवासँगको बैठकमा महामन्त्री शर्माले नियमित महाधिवेशन हुन्छ पनि भन्ने र विशेष नगर्ने ग्यारेन्टी गर्ने भन्ने प्रस्ताव सही नभएको बताए । ‘नियमितको क्यालेन्डर ल्याएर गर्ने महाधिवेशनको टुङ्गो हुनुप¥यो,’ शर्माले भने, ‘अब विशेषबाहेक अरु केही हुँदैन । दुवै पक्षबिच कुरा मिल्न नसकेपछि शुक्रबारका लागि बोलाइएको केन्द्रीय कार्यसमिति बैठक आइतबारसम्मका लागि सारिएको छ । बिहीबारको बैठकमा संस्थापनका तर्फबाट नियमित महाधिवेशनको क्यालेन्डर ल्याउने, क्यालेन्डर आइसकेपछि विशेष महाधिवेशनको निवेदन फिर्ता नगर्ने तर, विशेष महाधिवेशन हुँदैन भन्ने ग्यारेन्टी गर्नुपर्ने प्रस्ताव गरिएको थियो । त्यो प्रस्तावलाई महाममन्त्रीद्वयले ठाडै अस्वीकार गरेको बैठकमा सहभागी स्रोतले जानकारी दियो ।