सूर्यज्योति लाइफद्वारा प्रधानमन्त्री दैवी प्रकोप उद्धार कोषमा १ करोड सहयोग हस्तान्तरण

काठमाडौँ । बाढीबाट प्रभावित नागरिकहरूको उद्धार, राहत तथा पुनःस्थापनामा सहयोग पुर्‍याउने उद्देश्यले सूर्यज्योति लाइफ इन्स्योरेन्स कम्पनी लिमिटेडले प्रधानमन्त्री दैवी प्रकोप उद्धार कोषमा एक करोड रुपैयाँ आर्थिक सहयोग हस्तान्तरण गरेको छ। कम्पनीका अध्यक्ष केशवप्रसाद भट्टराई, सञ्चालक हेमन्त नाहटा तथा प्रमुख कार्यकारी अधिकृत प्रकाश विक्रम खत्रीले संयुक्त रूपमा उक्त सहयोग रकम माननीय अर्थमन्त्री स्वर्णिम वाग्लेलाई हस्तान्तरण गरेको हो । कम्पनीले बाढी गएको दोस्रो दिनमा नै उक्त रकम दिने घोषणा गरेको थियो । देशमा हालै आएको विनाशकारी बाढीबाट प्रभावित नागरिकहरूको उद्धार, राहत तथा पुनःस्थापनाका लागि नेपाल सरकार, सुरक्षा निकाय तथा विभिन्न संघ संस्थाहरूबाट भइरहेको प्रयासप्रति ऐक्यबद्धता जनाउँदै कम्पनीले उक्त सहयोग रकम हस्तान्तरण गरेको हो।

कम्पनीले विगतमा समेत राष्ट्रले आवश्यकता महसुस गरेका विभिन्न प्रतिकूल परिस्थितिमा आर्थिक तथा विविध प्रकारको सहयोग गर्दै आइरहेको र हालको अवस्थामा समेत प्रधानमन्त्री दैवी प्रकोप उद्धार कोषमा कम्पनीले गरेको एक करोड रुपैयाँको आर्थिक सहयोगले बाढीबाट प्रभावित नागरिकहरूको तत्कालीन आवश्यकता सम्बोधन गर्नुका साथै उद्धार, राहत तथा पुनःस्थापनाका कार्यमा समेत सहयोग पुग्ने कम्पनीले विश्वास लिएको छ। विपद्को यस कठिन घडीमा प्रभावित परिवारहरूको राहत तथा दीर्घकालीन पुनःस्थापनाका लागि सबै क्षेत्रबाट सहयोग र सहकार्य आवश्यक रहेको कम्पनीको धारणा छ। साथै राष्ट्रलाई आवश्यकता परेको अवस्थामा आगामी दिनमा समेत आफ्नो सामाजिक उत्तरदायित्वअन्तर्गत सहयोग र सहकार्यलाई निरन्तरता दिने जनाएको छ । सूर्यज्योति लाइफ इन्स्योरेन्स कम्पनी लिमिटेडले बाढी तथा पहिरोबाट प्रभावित सम्पूर्ण नागरिकहरूप्रति हार्दिक सहानुभूति व्यक्त गर्दै मृतकहरूप्रति श्रद्धाञ्जली तथा शोकसन्तप्त परिवारजनमा समवेदना प्रकट गरेको छ ।