सीजीले नेपाली क्रिकेट टिमलाई १० लाख प्रदान

काठमाडौं । चौधरी ग्रुपअन्तर्गत सीजी फुड्स नेपाल लिमिटेडले उत्पादन गर्दै आएको वाइवाइले एक कार्यक्रमबीच नेपाल क्रिकेट संघ (क्यान) लाई १० लाख रुपैयाँ प्रदान गरेको छ । नेपाली राष्ट्रिय टिम ट्वान्टी–२० विश्वकपमा सहभागी हुँदा खेलाडीलाई प्रोत्साहनस्वरुप वाइवाइले प्रत्येक रनका निम्ति एक हजार, चौकाका लागि आठ हजार, छक्काबापत १२ हजार रुपैयाँ उपलब्ध गराउने घोषणा गरेको थियो । यस्तै, प्रत्येक विकेटका निम्ति १५ हजार, अर्धशतकबापत ५० हजार, शतकका लागि एक लाख र नेपाली टिमको प्रत्येक जितमा एक लाख ५० हजार रुपैयाँ नगद उपलब्ध गराउने घोषणा गरेको थियो । नेपाल सुपर ८ मा पुगे ३० लाख रुपैयाँ दिने घोषणा समेत गरिएको थियो । सोही घोषणा बमोजिम विश्वकपमा नेपाली टिमको समग्र प्रदर्शनानुसार सम्पूर्ण रनको तीन लाख पाँच हजार, विकेटको तीन लाख १५ हजार, चौकाहरूको दुई लाख १६ हजार, छक्काहरूको एक लाख आठ हजार गरी नौ लाख ४४ हजार भएको थियो । उक्त रकममा ५६ हजार रुपैयाँ थप गरी हस्तान्तरण गरिएको सीजीले जनाएको छ । बुधबार ललितपुरको होटेल भिभान्तामा आयोजित कार्यक्रमबीच सीजी फुड्सका सीईओ प्रदीप पुडासैनीले क्यानका सचिव पारस खड्कालाई उक्त रकमको चेक हस्तान्तरण गरे ।

त्यस अवसरमा सीईओ पुडासैनीले ट्वान्टी–२० विश्वकपमा सहभागी राष्ट्रिय टिममा आबद्ध खेलाडीलाई नेपालको राष्ट्रिय झन्डा विश्वकपको मैदानमा फहराउन सफल भएकामा बधाई एवं धन्यवाद दिए । क्यानका सचिव खड्काले नेपाली क्रिकेटलाई जगैदेखि बलियो बनाउन चौधरी ग्रुपले पुर्‍याउँदै आएको योगदान उच्च रहेको बताए । वाइवाइले प्रायोजन गरेको यू–१९ प्रतियोगितमा आफूले वाइवाइको जर्सी लगाएर मैदानमा खेलेको पनि राष्ट्रिय टिमका पूर्वकप्तान समेत रहेका खड्काले स्मरण गरे । वाइवाई लामो समयदेखि पुरुष यू–१९ क्रिकेट टिमलाई प्रायोजन गर्दै आएको छ । वाइवाइले महिला यू–१९ क्रिकेट टिमलाई समेत प्रायोजनबापत ३० लाख र अरू क्रिकेट गतिविधि सञ्चालनका निम्ति ३० लाख गरी ६० लाख रुपैयाँ क्यानलाई सहयोग गर्ने घोषणा पनि गरेको छ । उक्त रकम क्यानसँगको समन्वयमा निकट भविष्यमा हस्तान्तरण गरिनेछ । यस्तै, वाइवाइले नेपाली क्रिकेटप्रेमी दर्शकलाई हौसला तथा उत्साह प्रदान गर्ने उद्देश्यले विश्वकप अवधिभर वाइवाइ क्रिकेट ‘प्रेडिक्ट एन्ड विन कन्टेस्ट’ सञ्चालन गरेको थियो । त्यसअन्तर्गत पहिलो, दोस्रो र तेस्रो पुरस्कार विजेतालाई क्रमशः एक लाख, ५० हजार र २५ हजार तथा टुर्नामेन्ट प्रेडिक्सनअन्तर्गत चार विजेतालाई १५ हजार रुपैयाँ नगद पुरस्कार पनि प्रदान गरिएको छ ।