परराष्ट्रमन्त्री देउवा आज चीन भ्रमणमा जाने
काठमाडौँ । परराष्ट्रमन्त्री डा. आरजु राणा देउवा आज चीन भ्रमणमा जाने भएकी छन् ।
परराष्ट्रमन्त्रालयका अनुसार मन्त्री राणाले प्रधानमन्त्री केपी शर्मा ओलीको आसन्न चीन भ्रमणको अवसरमा आजदेखि शनिबारसम्म चीनको भ्रमण गर्ने भएकी हुन् । मन्त्री राणा विहिबार बेइजिङ प्रस्थान गरेपछि मंसिर १४ मा चिनियाँ विदेशमन्त्री वाङ यीसँग दुई पक्षीय वार्ताको कार्यक्रम रहेको छ ।
सो वार्तामा प्रधानमन्त्री ओलीको चीन भ्रमण सहित अन्य विषयमा छलफल हुने मन्त्रालयले जानकारी दिएको छ । आगामी मंसिर १७ गते प्रधानमन्त्री केपी शर्मा ओली ४० सदस्यीय टोलीको नेतृत्व गर्दै चीन भ्रमणमा जाँदैछन् । परराष्ट्रमन्त्री राणा सोही भ्रमणको तयारीका लागि आजै चीन जान लागेकी हुन् ।