लखनउमा गुडिरहेको बसमा आगलागी, पाँच यात्रुको जलेर मृत्यु

काठमाडौँ । भारतको लखनउमा बिहीबार बिहान एउटा गुडिरहेको स्लिपर एसी बसमा आगलागी भएको छ।

दुर्घटनामा पाँच जना यात्रुको जलेर मृत्यु भएको छ। मृत्यु हुनेमा २ बालबालिका, २ महिला र १ पुरुष छन्। बसमा लगभग ८० जना यात्रु थिए। बस बिहारबाट दिल्ली जाँदै थियो। आगलागी पछि पनि बस लगभग एक किलोमिटरसम्म दौडिरहेको बताइएको छ ।

प्रहरी र सर्वसाधारणको सहयोगमा सिसा फुटाएर बसमा बसेका यात्रुहरूलाई बाहिर निकालिएको थियो । दमकलले करिब आधा घण्टामा आगो नियन्त्रणमा ल्याएको थियो । जब अग्निनियन्त्रकहरू बस भित्र गए, तिनीहरूले त्यहाँ पाँच जनाको शव भेट्टाएका थिए । आगोमा जलेका यात्रुहरूलाई उपचारको लागि अस्पताल लगिएको बताइएको छ । 

प्राप्त जानकारी अनुसार, दमकल घटनास्थलमा पुगेर आधा घण्टा भित्र आगो नियन्त्रणमा लिएको थियो । प्रहरी अनुसन्धानबाट बसको आपतकालीन ढोका नखुलेको र पछाडि बसेका मानिसहरू बसभित्रै अड्किएको बताइएको छ ।