बालकोटका जेष्ठ नागरिकलाई न्यानो लुगा वितरणगरि सम्मान

भक्तपुर। सुर्यविनायक नगरपालिका वडा नं २ वडा कार्यालयले सो वडा बालकोटका बाआमा (जेष्ठ नागरिक) र उहाँहरुलाई दैनिक खाजा खुवाउने र रेखदेख गर्ने सहयोगी समेत गरि ९० जनालाई न्यानो लुगा दिएर सम्मान गरेको छ । अन्तर्राष्ट्रिय जेष्ठ नागरिक दिवसको अवसर पारेर भागवत कथावाचक एवम् आध्यात्मिक गुरु आचार्य कपिलदेव सुवेदीको उपस्थितिमा उहाँहरुलाई सुर्यविनायक नगरपालिका वडा नं २ का अध्यक्ष अधिवक्ता प्रदिप कार्की तथा नगर सभा सदस्य भगत रानाभाटले न्यानो लुगा वितरण गरेका थिए । न्यानो लुगा हस्तान्तरण कार्यक्रममा महालक्ष्मी नगरपालिका वडा नं ७ का अध्यक्ष बाबुराजा महर्जनको साथै गुप्तेश्वर महादेव संरक्षण समितिका अध्यक्ष शिवराम श्रेष्ठ तथा दिवा सेवा समितिका संयोजक भाईकृष्ण श्रेष्ठको पनि सहभागिता थियो ।

बालकोट, सिरुटार र चाँगाथलीको सीमानामा रहेको गुप्तेश्वर महादेव मन्दीर परिसरमा निर्माण भएको जेष्ठ नागरिक दिवा सेवा केन्द्रमा सो वडाका बा आमा दैनिक रुपमा आएर भजन किर्तन तथा धार्मिक कृयाकलाप गर्नुको साथै दैनिक बसिवियाँलो गर्नुहुन्छ । उहाँहरुलाई सो वडा कार्यालयले हरेक महिनाको अन्तिम सोमबार वडा स्वास्थ्य कार्यालयबाट गएका स्वास्थ्यकर्मीले निःशुल्क स्वास्थ्य जाँच गरि आवश्यक पर्ने औषधि पनि दिँदै आएका छन् । पोहोरदेखिनै उहाँहरुको निशुल्क स्वास्थ्य जाँचको काम शुरु गरिएको वडाध्यक्ष प्रदिप कार्कीले बताए । जेष्ठ नागरिक सम्मानको लागि वडाले चालु आर्थिक वर्षमा २ लाख ५० हजार रुपैयाँ बजेट विनियोजन गरेको छ । सो बजेटबाट दिवा सेवाको लागि दैनिक केही खर्च, दिवा सेवामा आउने बाआमाको सम्मान र न्यानो लुगाको साथै उहाँहरुलाई धार्मिक यात्रा अर्थात तीर्थाटन गराइने वडाध्यक्ष कार्कीले बताए ।