चलचित्र ‘मोदीबेनी’ को ट्रेलर सार्वजनिक

काठमाडौँ । साउन १८ गते रिलिज हुने नेपाली कथानक चलचित्र ‘मोदीबेनी’को अफिसियल ट्रेलर हिजो बिहिबार काठमाडौंमा एक समारोहबीच सार्वजनिक गरिएको छ ।
चलचित्रमा वर्षा सिवाकोटी, अपर प्रताप श्रेष्ठ, सरोज खनाल, प्रवीण खतिवडा, रेजिना उप्रेती, दिलीप केसी, जीवन भट्टराई, कमलमणि नेपाल, स्नेहा भट्टराई, सुब्रतराज आचार्य, अनामिका लामिछाने, पूजन श्रेष्ठ, गोविन्द सुनार, सरोज अर्याल, लविस गर्तौला, शेर बहादुर बराल, रोजी श्रेष्ठ, हिउवाला गौतम लगायतको अभिनय रहेको छ।
यस चलचित्र मार्फत अभिनेता अमर प्रताप श्रेष्ठ डेब्यु गर्दैछन् । चलचित्र त्रिकोणात्मक प्रेम कथावरिपरि घुमेको आभास सार्वजनिक ट्रेलरबाट बुझ्न सकिन्छ । चलचित्रको कथावस्तु पर्वत जिल्लाको मोदीबेनी क्षेत्रमा घटेको अविश्वसनीय घटनामा आधारित छ ।
शङ्कर कोइरालाको निर्देशनमा बनेको यस चलचित्रलाई आनन्द विक्रम क्षेत्रीले लेखेका छन । दिलीप केसी निर्माता र हरि श्रेष्ठ सह निर्माता रहेको यो चलचित्रको छायाङ्कन उत्सव दाहालले गरेका छन् ।
डिनेस्ट इन्टरटेनमेन्टको प्रस्तुतिमा बनेको यो चलचित्रलाई रिच इन्टरटेन्मेन्टले काठमाडौं उपत्यका र एफडी कम्पनीले उपत्यका बाहिर वितरण गर्ने निर्माण पक्षले जानकारी दिएको छ ।