लुम्बिनीमाथि पोखराको शानदार जित
काठमाडौं । सिद्धार्थ बैंक नेपाल प्रिमियर लिग (एनपिएल)मा पोखरा एभेन्जर्सले पहिलो जित दर्ता गरेको छ ।
लुम्बिनी लायन्सलाई १० विकेटले पराजित गर्दै पोखरा एभेन्जर्सले पहिलो जित दर्ता गरेको हो । लुम्बिनी लायन्सले दिएको १ सय ७१ रनको लक्ष्य पोखरा एभेन्जर्सले १६.५ ओभरमा विना विकेटको क्षतिमा पुरा गर्यो । पोखराको जितमा ब्याटर एन्ड्रिज गौसले शानदार शतक प्रहार गरे । उनले ५४ बलमा १०३ रनको आक्रामक इनिङ खेले । अर्का ओपनर दिनेश खरेलले शानदार अर्ध शतक प्रहार गरे । उनले ४० बलमा ६० रन बनाए । लुम्बिनी लायन्सका कुनै पनि बलरले विकेट लिन सकेनन् ।
त्यसअघि टस जितेर पहिले ब्याटिङ गरेको लुम्बिनी लायन्सले निर्धारित ओभरमा ५ विकेट गुमाउँदै १७० रन जोड्यो ।लुम्बिनीका लागि कप्तान रोहित पौडेलले सर्वाधिक ९५ रन जोडे । रोहितले ५९ बलमा ९५ रनको आक्रामक कप्तानी पारि खेले ।