नेपालले जलवायु परिवर्तनको ठूलो समस्या भोगिरहेको छ : मन्त्री राणा
काठमाडौं । परराष्ट्र मन्त्री आरजु राणा देउवाले नेपाल हिमाली देश भएको हुनाले, नेपालले जलवायु परिवर्तनको ठूलो समस्या भोगिरहेको बताएकी छन्।
बुधबार काठमाडौंमा आयोजित राष्ट्रिय कार्यशाला दक्षिण एसियाका लागि जलवायु अनुकूलन र लचिलोपन परियोजना कार्यक्रममा उनले नेपालले जलवायु परिवर्तनको ठूलो समस्या भोगि रहेको भन्दै सगरमाथा संवादले विश्वका नीति निर्माता, पत्रकार र विभिन्न समाजलाई जलवायु परिवर्तको बारेमा छलफल गर्न एकै ठाँउमा ल्याउने बताएकी हुन्। उनले भनिन्, ‘नेपाल हिमाली देश भएको हुनाले, नेपालले जलवायु परिवर्तनको ठूलो समस्या भोगि रहेको छ। सगरमाथा संवादले विश्वका नीति निर्माता, पत्रकार र विभिन्न समाज सबैलाई जलवायु परिवर्तको बारेमा छलफल गर्न एकै ठाँउमा ल्याउने काम गर्छ। हामीले यो संवादमा विशेष गरेर हिमालहरुलाई प्राथमिकता दिने छौ।’ यस्तै, उनले नेपाललाई बलियो पूर्वाधारको आवश्यकता भएको भन्दै अन्य देशका साझेदारहरूको साथ प्राकृतिक जलवायु स्थिर गर्न र जीविकोपार्जन सहज गर्नेतर्फ लागेको बताईन्।
उनले भनिन्, ‘नेपाललाई बलियो पूर्वाधारको आवश्यकता छ। यसैले हामी अन्य देशका साझेदारहरूको साथ हाम्रो देशको सेवा गर्न चाहन्छौं। प्राकृतिक जलवायु स्थिरीकरणकर्ताको रूपमा, आर्थिक पुलको रूपमा विकास गर्दै र जीविकोपार्जनमा पनि योगदान पुर्याउन चाहन्छौं।’ विपद् जोखिम व्यवस्थापनमा धेरै चुनौतीहरुको सामना गर्नुपरेको भन्दै नेपाल विपद् जोखिम न्यूनिकरण, व्यवस्थापन, नीति निर्माण र प्रविधिको विकासको क्षेत्रमा गम्भिर भएर लागि रहेको पनि उनको भनाई छ।
साथै, उनले नेपालमा बढ्दो तापक्रम, हिमनदीहरू पग्लने जस्ता कारणले गर्दा गम्भीर जलवायु–प्रेरित प्राकृतिक प्रकोपहरूको सामना गर्नु परेको भन्दै यसले ठूलो मात्रामा विनाश र क्षति र खडेरी निम्त्याएको पनि बताइन्।