भारतलाई आईसीसी ट्वान्टी–२० विश्वकपको उपाधि

काठमाडौं । भारत र श्रीलंकाको संयुक्त आयोजनामा यस वर्ष सम्पन्न आईसीसी ट्वान्टी–२० विश्वकप विश्वकपको इतिहासमा सबैभन्दा धेरै शतक प्रहार भएको संस्करण बनेको छ । अहमदाबादस्थित नरेन्द्र मोदी क्रिकेट रंगशालामा घरेलु टोलीले न्युजिल्यान्डलाई ९६ रनले पराजित गर्दै तेस्रोपटक उपाधि जित्यो । यो खेलको समाप्तिमा प्रतियोगिता अवधिभर कुल सात शतक प्रहार भयो । यससँगै यो विश्वकपको इतिहासमा सर्वाधिक शतक प्रहार भएको संस्करण बनेको हो । यस संस्करण पाकिस्तानका साहिबजादा फरहान दोहोरो शतक प्रहार गर्ने एक मात्र खेलाडी बने । उनीसँगै श्रीलंकाका पथुम निसांका, क्यानडाका युवराज शर्मा, इंग्ल्यान्डका ज्याकोब बेथल, ह्यारी ब्रुकले र न्युजिल्यान्डका फिन एलनले समान एक,एक शतक प्रहार गरे । यसअघिका विश्वकपमा कम्तीमा एक शतक प्रहार भएको थियो । अधिकतम दुईसम्म शतक प्रहार भएको थियो । दक्षिण अफ्रिकामा सन् २००७ मा सम्पन्न पहिलो संस्करणमा क्रिस गेल एक मात्र शतक प्रहार गर्ने क्रिकेटर बनेका थिए ।

त्यसपछि २०१० मा सम्पन्न विश्वकपमा भारतका सुरेश रायना र श्रीलंकाका महेला जयावार्देनेले समान एक शतक प्रहार गरेका थिए । दुई वर्षपछि सन् २०१२ मा भएको विश्वकपमा न्युजिल्यान्डका ब्रान्डन म्याक्मुलेनले मात्र १०० रन पूरा गर्न सके । २०१४ मा भएको पाँचौँ संस्करणमा इंग्ल्यान्डका एलेक्स हेल्स र पाकिस्तानका अहमद शेहजादले समान एक शतक आफ्नो नाममा ल्याएका थिए । २०१६ मा पनि बंगलादेशका तामिम इक्बाल र वेस्ट इन्डिजका क्रिस गेल शतक बनाउने दुई क्रिकेटर बने । त्यसको पाँच वर्षपछि सन् २०२१ मा विश्वकप आयोजना हुँदा इंग्ल्यान्डका जस बट्लर शतक पूरा गर्ने एकल क्रिकेटर बने । अर्को वर्ष सन् २०२२ मा विश्वकपले निरन्तरता पाउँदा १०० रनको पारी खेल्ने क्रिकेटरको सूचीमा दक्षिण अफ्रिकाका राइली रोसोउ र श्रीलंकाका पथुम निसांका रहे ।