गृहमन्त्री असभ्य र हिंस्रक ढंगले प्रस्तुत भए ः कांग्रेस

काठमाडौं । प्रमुख प्रतिपक्ष दल नेपाली कांग्रेसले उपप्रधान एवं गृहमन्त्री रवि लामिछाने सहकारीको बचत अपचलनमा संलग्न रहेको भन्दै संसदीय छानबिन समिति बनाउनुपर्ने ‘बटमलाइन’ कायमै राखेको छ । आज बिहान बसेको कांग्रेस संसदीय दलको बैठकबाट समेत लामिछाने त्यसमा संलग्न रहेको पुष्टि हुँदै गएको निष्कर्ष निकालिएको छ । बचत हिनामिना, ठगी भएको छ । ठगी गर्ने काममा माननीय गृहमन्त्री रवि लामिछाने संलग्न रहेको प्रस्ट भएको छ, बैठकपछि कांग्रेसका प्रमुख सचेतक रमेश लेखकले भने, आजको बैठकले सहकारीको ठगीको छानबिनमा संलग्न रवि लामिछाने र सम्बन्धितलाई कडा कारबाही गर्न संसदीय छानबिन समिति गठनको पूर्ववर्ती निर्णयमा दृढ छौँ ।

उनले आइतबारको प्रतिनिधिसभामा बैठकमा गृहमन्त्री असभ्य रूपमा प्रस्तुत भएको बैठकबाट निष्कर्ष निकालिएको जानकारी दिए । उनले गृहमन्त्री भ्रामक, कपोकल्पित ढंगले प्रस्तुत भएको आरोप लगाए । लेखकले गृहमन्त्रीले प्रश्न सोध्ने नभएर आफूमाथिका प्रश्नको जवाफ दिनुपर्ने बताए । आफूमाथि लागेको आरोपबाट भाग्ने प्रयास गर्नुभयो । असभ्य र हिंस्रक ढंगले प्रस्तुत गर्नुभएको छ, लेखकले भने ।