महाराष्ट्र रेल दुर्घटनामा नेपालीको मृत्यु भएकोमा परराष्ट्रमन्त्रीद्वारा दुख व्यक्त
काठमाडौं । परराष्ट्रमन्त्री डा. आरजु राणा देउवाले भारतको महाराष्ट्रमा भएको रेल दुर्घटनामा परी नेपाली र भारतीय नागरिकको मृत्यु भएको खबरले आफू दुःखी भएको बताएकी छिन् ।
उनले उक्त दुर्घटनामा ज्यान गुमाउनेहरुप्रति भावपूर्ण श्रद्धाञ्जली र उनीहरुका परिवारजनमा समवेदना व्यक्त गरेकी छिन् । साथै, उनले यस विषयमा भारतका लागि नेपाली राजदूत डा. शंकर शर्मा र नेपालका लागि भारतीय राजदूत नवीन श्रीवास्तवसँग फोनमार्फत कुरा गरेको जानकारी गराएकी छन् ।
उनले लेखेकी छिन्-
भारतको महाराष्ट्रमा हिजो भएको रेल दुर्घटनामा परी नेपाली र भारतीय नागरिकको मृत्यु भएको खबरले निकै दुःख लागेको छ । यस दुर्घटनामा ज्यान गुमाउनेहरुप्रति भावपूर्ण श्रद्धाञ्जली तथा उहाँहरुका परिवारजनमा हार्दिक समवेदना व्यक्त गर्दछु । साथै घाइतेहरुको शीघ्र स्वास्थ्यलाभको कामना गर्दछु । आज बिहान भारतका लागि नेपाली राजदूत र नेपालस्थित भारतीय राजदूतलाई फोन सम्पर्क गरी उद्वार एवं घाइतेहरुको स्वास्थ्य उपचारमा तदारुकताका लागि भारत सरकार र सम्बद्ध सरोकारवालाहरुसँग आग्रह गरेकी छु ।
उक्त दुर्घटनामा अहिलेसम्म चार नेपालीसहित १९ जनाको मृत्यु भएको भारतीय मिडियाहरुले उल्लेख गरेका छन् ।