धनगढी झडपमा १२ जना नियन्त्रणमा

धनगढी । धनगढी १३ कैलाली गाँउमा दुई समूहबीच भएको झडपमा दुई प्रहरी र एकजना स्थानीय घाइते भएका छन् । असई डबल साउद र धनगढी वडा प्रहरीका इन्चार्ज प्रहरी निरीक्षक बलराम पाण्डे गम्भीर घाइते भएका छन् । यस्तै, स्थानीय लोकेश खत्री पनि घाइते भएको जिल्ला प्रहरी कार्यालय धनगढीका प्रहरी प्रमुख केशवबहादुर चन्दले जानकारी दिए । गम्भीर चोट लागेका असई साउद र खत्रीको अहिले उपचार भइरहेको छ । तीनै जनालाई उपचारका लागि माया मेट्रो अस्पताल पठाइएको थियो । मंगलबार साँझ करिब ६ बजे होली मनाउने क्रममा पुरानो रिसिइबीको निहुँमा दुई टोलका युवाबीच वादविवाद भएपछि झैझगडा सुरु भएको थियो ।

स्थिति असामान्य बन्दै गएपछि कैलाली निर्वाचन क्षेत्र–५ अन्तर्गत जनता राष्ट्रिय माध्यमिक विद्यालय राजपुरको मतदानस्थलमा खटिएको प्रहरी टोली र धनगढीबाट थप प्रहरी परिचालन गरिएको थियो । भीड नियन्त्रणमा लिन प्रहरीले ६ राउन्ड हवाई फायर गरेको जिल्ला प्रहरी कार्यालय कैलालीका प्रहरी नायब उपरीक्षक योगेन्द्र तिमिल्सिनाले जानकारी दिए । स्थिति नियन्त्रणमा लिने प्रयास भइरहेकै बेला करिब तीन सय जनाको समूहले प्रहरी टोली र प्रहरी भ्यानमाथि ढुंगामुढा प्रहार गरेको थियो । ढुंगामुढाबाट प्रहरीको बिएसी ३४८० नम्बरको स्कार्पियो भ्यानको समेत सिसा फुटेको छ । प्रहरीले घटनामा संलग्न भएको आरोपमा धनगढी उप–महानगरपालिका–१३ बस्ने रामदयाल राना, राकेश सुनार, नरसिंह राना, सुनिल चौधरी र जितेन्द्र रानासहित १२ जनालाई नियन्त्रणमा लिएको जनाएको छ । अन्य संलग्न व्यक्तिहरूको खोजतलास गरी अनुसन्धान भइरहेको जिल्ला प्रहरीले जनाएको छ ।