काठमान्डुलाई पराजित गर्दै लुम्बिनी दोस्रो क्वालिफायरमा,फाइनल पुग्न भोली विराटनगरसँग खेल्ने
काठमाण्डौं । लुम्बिनी लायन्स सिद्धार्थ बैंक नेपाल प्रिमियर लिग (एनपिएल) को दोस्रो क्वालिफायरमा प्रवेश गरेको छ। बुधबार कीर्तिपुरस्थित त्रिवि मैदानमा भएको इलिमिनेटको खेलमा काठमान्डु गोर्खाजलाई ४ विकेटले पराजित गर्दै लुम्बिनी दोस्रो क्वालिफायरमा पुगेको हो। अब दोस्रो क्वालिफायरमा लुम्बिनीले बिहीबार विराटनगर किंग्ससँग प्रतिस्पर्धा गर्नेछ। यो खेलको विजेताले शनिबार हुने फाइनलमा सुदूरपश्चिम रोयल्ससँग प्रतिस्पर्धा गर्नेछ। बुधबार काठमान्डुले दिएको ११२ रनको लक्ष्य लुम्बिनीले १७.४ ओभरमा ६ विकेटको क्षतिमा पूरा गर्यो। लुम्बिनीका लागि ओपनर डार्शी सर्टले ३३ रनको योगदान गरे। उनले ३४ बलमा २ छक्का प्रहार गरे। उनी तेस्रो विकेटको रूपमा १२औं ओभरको अन्तिम बलमा काठमान्डुका रशिद खानको बलमा विकेटकिपर जोन सिमसनबाट समातिएका थिए। ओपनिङमा मौका पाएका दिनेश अधिकारी ४ रनमै आउट भए। उनी तेस्रो ओभरमा सनी पटेलको बलमा करण केसीबाट समातिए। कप्तान रोहित कुमार पौडेलले २५ बल खेलेर १ चौका र १ छक्काको मद्दतमा १८ रन बनाउन सके। रोहितलाई नवौं ओभरको अन्तिम बलमा शाहब आलमले बोल्ड गरेका थिए। सन्दीप जोरा २३ रन जोडेर आउट भए। २३ बलमा १ चौका र १ छक्का प्रहार गरेका जोरालाई १७औं ओभरमा सन्तोष यादवले बोल्ड गरेका थिए। दिलिप नाथ ७ रनमा सन्तोष यादवकै एलबिडब्लूको धरापमा परे। अर्को ओभरमा निरोशन डिक्वेलालाई काठमान्डुका कप्तान करण केसीले १४ रनमा बोल्ड गरे। उनले १४ बलमा २ चौका प्रहार गरे। अन्त्यमा रुबेल ट्रम्पलम्यानले चौका प्रहार गरेर लुम्बिनीलाई जिताए। बलिङमा काठमन्डुका सन्तोष यादवले २ विकेट लिए। करण केसी, सनी पटेल, शाहब आलाम र रशिद खानले १-१ विकेट हात पारे। टस जितेर पहिले ब्याटिङ गरेको काठमान्डु खराब ब्याटिङ गर्दा १९.१ ओभरमा १११ रनमा अलआउट भएको थियो। काठमान्डुको सुरूवाती ब्याटिङ लाइनअप कोल्याप्स्ड पारेको लुम्बिनीले पावरप्लेभित्र चार विकेट लिएको थियो। काठमान्डुका शीर्ष चार ब्याटर दोहोरो अंक जोड्न नपाइ आउट हुँदा टोली संकटमा पारेको थियो। पिचमा बल टर्न भइरहदा ब्याटरले संघर्ष गरेका थिए। दोस्रो ओभरको पहिलो काठमान्डुका ओपनिङ ब्याटर आकाश त्रिपाठीलाई (१ रन) लुम्बिनीका शेर मल्लले कप्तान रोहितकुमार पौडेलबाट क्याच गराए। तेस्रो ओभरको पहिलो बलमा काठमान्डुले अर्को विकेट गुमायो। सनी पटेल (७ रन) लुम्बिनीका नामिबियन तीव्र गतिका बलर रुबेन ट्रम्पलम्यानको एलबिडब्लूको सिकार बने। चौथो ओभरको पाँचौ बलमा भारतीय मूलका अमेरिका ब्याटिङ अलराउन्डर मिलिन्द कुमार (२ रन) लाई शेर मल्लले बोल्ड गर्दै व्यक्तिगत दोस्रो विकेट लिए। पाँचौ ओपनर बेन चार्ल्सवर्थ (४ रन) पनि पेभिलियन फर्किए। उनी विकेट पछाडि निशोसन डिक्वेलाबाट समातिदा ट्रम्पलम्याचले दोस्रो विकेट तथा टोलीका लागि चौथो सफलता दिलाए। लगातार विकेट लिएको लुम्बिनीका लागि कप्तान रोहितकुमार पौडेलले दशौं ओभरमा दुई विकेट लिएपछि लुम्बिनी खेलमा हाबी भयो। रोहितले पहिलो बलमा भीम सार्कीलाई दिलिप नाथबाट क्याच गराए। सार्कीले १४ रन जोड्ने क्रममा १६ बलमा १ छक्का प्रहार गरे। उनले जोन सिमसनसँग पाँचौ विकेटका लागि ३६ रनको साझेदारी गरे। पाँचौ बलमा सिमसन पनि एलबिडब्लूको धरापमा परे। सिमसनले १७ बलमा १८ रन जोड्ने क्रममा १ चौका र १ छक्का प्रहार गर्न सफल भए। त्यतिबेला काठमान्डुले ९.५ ओभरमा ६ विकेटको क्षतिमा ५१ रन मात्र जोडेको थियो। दुई ओभरको बीचमा थप एक रन जोड्दा काठमान्डुले आफ्नो सातौ विकेट गुमायो। रशिद खानलाई कप्तान रोहितले २ रनमा जेजे स्मिटबाट क्याच गराएका थिए। १४औं औभरमा काठमान्डुका आशा गरिएका ब्याटर आदिल अन्सारी १८ रन जोडेर आउट भए। उनले ११ बलमा १ चौका र २ छक्का प्रहार गरेका थिए। उनलाई शेर मल्लले बोल्ड गर्दै पेभिलियन फर्काए। उनले सन्तोष यादवसँग आठौं विकेटका लागि २० रनको साझेदारी गरे। कप्तान करण केसी १४ बलमा ९ रन जोडेर आउट हुन पुगे। अन्तिम ओभरमा सन्तोष यादव २३ रनमा रनआउट भए। काठमान्डुका लागि सर्वाधिक रन जोडेका यादवले १७ बल खेलेर १ छक्का प्रहार गर्न सके। बलिङमा लुम्बिनीका शेर मल्ल र कप्तान रोहित पौडेलले ३(३ विकेट लिए। मल्लले ४ ओभरमा २२ रन दिए भने रोहितले २५ रन खर्चिए। यस्तै ट्रम्पलम्यानले २ विकेट लिए। उनले ३.१ ओभरमा १ मेडन राख्दा १० रन मात्र दिए। आजको खेलमा काठमान्डुले कुनै परिवर्तन गरेको थिएन। लिगको अन्तिम खेल खेलेको टोलीलाई नै काठमान्डुले मैदान उतारेको थियो। यता लुम्बिनीमा एक परिवर्तन गर्यो। सुमित महर्जनको स्थानमा दिनेश अधिकारीलाई मौका दिइएको थियो। आजको खेलमा जित निकालेसँगै लुम्बिनीले भोलि बिहीबार विराटनगर किंग्ससँग प्रतिस्पर्धा गर्नेछ। यो खेलको विजेता फाइनलमा पुग्नेछ। यसअघि सुदूरपश्चिमले फाइनलमा स्थान पक्का गरिसकेको छ। सुदूरपश्चिमले पहिलो क्वालिफायरको खेलमा विराटनगरमाथि मंगलबार जित हात पारेको थियो। फाइनल प्रतिस्पर्धा शनिबार अपरान्ह साढे तीन बजे हुनेछ।