भोटेकोशी बाढीबाट प्रभावित चलचित्रकर्मीको विवरण संकलन गरिने

काठमाडौं । भोटेकोशी नदीमा आएको भीषण बाढीबाट ठूलो मानवीय तथा भौतिक क्षति भएपछि चलचित्र विकास बोर्डले आकस्मिक बैठक बसेर पाँच निर्णय गरेको जनाएको छ । बिहीबार अध्यक्ष दिनेश डीसीको अध्यक्षतामा बसेको बैठकले बाढीबाट प्रभावित चलचित्रकर्मीको तत्काल विवरण संकलन गर्ने, आवश्यक राहत उपलब्ध गराउन पहल गर्ने तथा चलचित्र क्षेत्रलाई विपद् सहयोग अभियानमा परिचालन गर्ने निर्णय गरेको हो । बोर्डले बाढीबाट जनधनको क्षति व्यहोरेका चलचित्रकर्मीको विवरण एकीकृत गरी चलचित्र विकास बोर्डमा उपलब्ध गराउन चलचित्रकर्मीका पेशागत संघ–संस्था तथा सरोकारवालालाई अनुरोध गर्ने निर्णय गरेको छ । प्रभावित चलचित्रकर्मीलाई सहयोग गर्न चलचित्रकर्मी कल्याणकारी कोषको अवस्था हेरी राहत उपलब्ध गराउने पहल समेत गरिने भएको छ ।

त्यस्तै, बाढीपीडितको सहयोगार्थ च्यारिटी शो आयोजना गर्न चलचित्रकर्मी संघ–संस्थालाई चलचित्र उपलब्ध गराउने र च्यारिटी शोबाट संकलित रकम प्रधानमन्त्री दैवी प्रकोप उद्धार कोषमा जम्मा गर्न सहयोग गर्ने निर्णय गरिएको छ । विपद्को संवेदनशील घडीमा अनावश्यक भ्रम, त्रास तथा तथ्यहीन सूचना फैलिन सक्ने भन्दै बोर्डले चलचित्र क्षेत्रका संघ–संस्थालाई संयमता अपनाउन, उद्धार तथा राहतमा हातेमालो गर्न र जनचेतनामूलक सामग्री निर्माण तथा प्रचारप्रसार गर्न समेत आग्रह गर्ने भएको छ । यसैबीच, बोर्ड अध्यक्ष डीसीले आफ्नो आधा महिनाको तलब बराबरको रकम प्रधानमन्त्री दैवी प्रकोप उद्धार कोषमा जम्मा गरी सहयोग गर्ने निर्णय गरेका छन् । अध्यक्ष डीसीको कार्यकाल आज शुक्रबारदेखि समाप्त हुँदैछ । तर, आज जनैपूर्णिमाको बिदा भएकाले उनले उनले बिहिबार नै आफ्नो कार्यकालको प्रगति विवरण पेश गरिसकेका छन् ।